venres, 23 de setembro de 2016

A CIG convoca folga no sector das ambulancias en protesta pola parálise patronal na negociación do convenio

O paro desenvolverase este venres, 23 de setembro, e afecta a todo o persoal do transporte sanitario urxente e non urxente de Galiza
A CIG ten convocada unha xornada de folga no sector das ambulancias de Galiza para o vindeiro venres, 23 de setembro, en protesta pola parálise na negociación do convenio colectivo do transporte sanitario. Denuncian que a patronal non só non achega ningunha proposta, senón que se escuda na cuestión económica para “non mover nin unha coma do convenio”.
16-09-21 RP Folga ambulancias
O argumento económico, explicou en rolda de prensa Xesús Pastoriza, Secretario de Transportes da FGAMT-CIG, derívase das propias actuacións das empresas de ambulancias “que gañaron os contratos concursando á baixa”. O pasado ano, o SERGAS adxudicou os lotes do transporte sanitario urxente e este agosto resolveu o non urxente “e practicamente todas as empresas gañaron con ofertas á baixa temerarias, algunhas ofrecendo até un 12% menos do prezo estipulado”.
Como exemplo, expuxo o caso da área de Ferrolterra, onde a UTE que resultou gañadora ofertou unha rebaixa de 300.000 euros no custe total do servizo. “Agora as empresas din que non lles dá para cubrir os custes económicos, pero iso non é culpa nin das condicións do convenio nin dos traballadores e traballadoras”. De feito, AmbuPadrón (na área de Compostela) veuse obrigada a vender a AmbuIbérica “porque non podía afrontar os gastos do servizo”.
Neste senso, Pastoriza tamén apuntou á responsabilidade da administración galega por tolerar que se presenten ofertas á baixas e adxudicar os contratos e este tipo de empresas, “cando sabe que logo tentarán trasladar esta rebaixa ás condicións do seu persoal”.
Xunto a isto, tanto Pastoriza como Néstor Torea, delegado da CIG no sector, denuncian a elevada atomización que se está a producir no sector, xa que para un mesmo contrato poden concorrer multitude de empresas distintas agrupadas nunha unión temporal, chegando a existir casos de UTEs integradas por seis compañías distintas para o mesmo contrato. Esta división, ademais, dificulta a coordinación do persoal (cada un dunha empresa distinta) e “polo tanto, tamén repercute na calidade do servizo que se presta aos usuarios e usuarias”.
Demandas da parte social
As principias reivindicacións da parte social céntranse en cinco puntos:
-Restrición do contrato de prácticas. As empresas do sector, indicou Pastoriza, están recorrendo habitualmente a este tipo de contratación que lles permite ter a un traballador ou traballadora durante dous anos cun salario rebaixado no 40%. Este tipo de contratación fomenta a temporalidade, crea dúas escalas salariais entre o persoal e supón un ataque á profesionalización do sector. Ademais, engade Pastoriza, “é un magnífico instrumento da patronal para debilitar a capacidade reivindicativa dos traballadores/as”.
- Limitación no convenio da realización das horas extraordinarias. Un exceso de xornada que afecta especialmente ao persoal cos contratos máis precarios e, polo tanto, con peores salarios.
- Creación da terceira paga extraordinaria, ao igual que xa aparece recollido en boa parte dos convenios colectivos.
- Ligado aos dous puntos anteriores, “e aínda que non é a nosa principal reivindicación”, demándase un incremento salarial “que permita aos traballadores e traballadoras levar un soldo digno sen verse na obriga de ter que facer horas extras a esgalla”.
-Finalmente, outra das cuestións nas que a CIG pon especial acento refírese á prevención de riscos e á saúde laboral. “Este é un sector no que se rexistra un elevado número de lesións músculo-esqueléticas que até agora non están recoñecidas como enfermidades profesionais e polo tanto non son atendidas como tal”.
Mobilizacións na xornada de folga
Coincidindo coa xornada de folga, que afecta tanto ao transporte sanitario urxente como ao non urxente, o persoal vai realizar mobilizacións nas distintas áreas e concentracións nos hospitais de referencia. No caso concreto da Coruña, esta programada unha caravana de vehículos que sairá ás 11:00 horas da explanada do edificio de sindicatos.
Pastoriza advertiu que esta xornada de paro “non é o final, senón o inicio das accións de protesta. É un primeiro aviso de que estamos dispostos a mobilizarnos en defensa dun convenio digno”.

martes, 13 de setembro de 2016

A CIG de Vigo pon en marcha unha campaña para reclamar “traballo digno na nosa terra”

A Unión Comarcal celebrou unha asemblea de delegados/as e unha marcha que rematou diante da Xunta
A Unión Comarcal da CIG de Vigo puxo en marcha hoxe unha campaña de mobilizacións para reclamar “traballo digno na nosa terra” ante a grave crise económica e de emprego que atravesa a bisbarra. A central celebrou unha asemblea de delegados/as para analizar a situación sociolaboral da comarca na que participou o secretario xeral, Suso Seixo, e a continuación desenvolveu unha manifestación que rematou diante do edificio admninistrativo da Xunta.
2016 09 13 AsembleaManifaDelegadosCampanhaEmpregoVigo01

A CIG-Vigo celebrou esta mañá a primeira das accións reivindicativas que fan parte da campaña de protestas que desenvolverá nas próximas semanas e que inclúe a convocatoria dunha manifestación comarcal o vindeiro martes día 20. Varios centos de delegados/as da central analizaron a situación sociolaboral da bisbarra nunha asemblea na que participaron os secretarios xeral, comarcal e nacional da federación de Industria.
O primeiro en tomar a palabra foi o máximo responsábel da CIG de Vigo, Alberto Gonçalves, que alertou de que a situación de crise que padece a bisbarra ameaza con convertela “nun deserto industrial”. Fronte a isto, reclamou unha verdadeira política industrial que apoie os principais sectores produtivos (naval, automoción, construción, pesca, etc) mediante o fomento da iniciativa pública.
Gonçalves criticou que a propaganda gubernamental do PP, “sobre todo en época electoral”, non deixe de repetir que xa saímos da crise e estamos en período de recuperación, “cando continuamos a sufrir un elevadísimo desemprego que atinxe a preto de 80.000 persoas na nosa comarca, moi por enriba das estatísticas oficiais, e unhas condicións laborais duras e precarias”.
Segundo denunciou, esta situación é consecuencia das políticas antiobreiras e de recortes aplicada polo PP dende a Xunta e dende Madrid ao ditado da Unión Europea e da Troika, que agravaron a crise en beneficio do empresariado e da banca privada. Así, sinalou que medidas como as reformas laborais de PP e PSOE só lograron eliminar dereitos e bloquear a negociación colectiva para favorecer a patronal. “Temos que mobilizarnos para facerlle fronte ao desemprego, á precariedade e ao empobrecemento que nos impoñen as políticas da dereita e conseguir mediante a loita na rúa e nos centros de traballo unha mudanza radical nestas políticas”.
A continuación falou o secretario nacional da CIG-Industria, Xoán Xosé Bouzas, que aproveitou para facer un repaso sobre as principais problemáticas que afogan o sector naval galego, en especial o da Ría de Vigo. Aboi considera especialmente preocupante a situación de crise que padece unha industria estratéxica para o noso país e censurou que o PP teña recoñecido que non vai facer nada para garantir a súa supervicencia. “O caso de Vigo é gravísimo, xa que se perderon uns 10.000 empregos en nove anos, quedando na actualidade menos de 1000 traballadores/as no sector”.
Aposta pola mobilización
O secretario xeral da CIG, Suso Seixo, foi o encargado de pechar as intervencións antes de abrir unha quenda de palabras entre os asistentes. O máximo responsábel da central nacionalista realizou unha explicación xeral sobre o contexto da crise, que achacou ao propio sistema capitalista. “O que está en crise é o sistema, polo que as marxes de beneficio na economía produtiva son cada vez menores, o que fai que se bote man da economía especulativa”.
Seixo lembrou que fronte a esta situación as empresas multiplican os mecanismos para aumentar o seu lucro, xa sexa mediante a fraude fiscal, a privatización de servizos públicos ou o empeoramento das condicións laborais. Neste senso, fixo especial fincapé no interese da patronal en rematar coa negociación colectiva co obxectivo de individualizar as relacións laborais e fomentar a división da clase traballadora. “Pretenden centralizar os convenios a nivel estatal para reducir a posibilidade de que poidamos incidir neles e melloralos”.
Diante disto, apostou por continuar coa mobilización social nas rúas e nas empresas e por seguir a achegar as alternativas da CIG, como o cento de medidas para o desenvolvemento económico e a creación de emprego que a central recolleu nunha Iniciativa Lexislativa Popular que o PP tumbou cos seus votos no Parlamento galego.
Finalmente, reivindicou a necesidade de que o noso país conte con plena soberanía política “fronte á concentración de poder en institucións cada vez máis alonxadas da cidadanía” e reclamou que as institucións máis próximas, como o Parlamento galego, poidan decidir plenamente. Para isto, considera imprescindíbel apoiar as organizacións sindicais e políticas galegas.

O persoal de BorgWarner chega a un acordo coa dirección para renovar o convenio colectivo

O texto, que terá unha vixencia de 4 anos, foi ratificado en asemblea polos traballadores/as da empresa de componentes da automoción viguesa.

O cadro de persoal de BorgWarner, empresa de componentes da automoció con sede en Vigo, aprobou este sábado en asemblea o preacordo alcanzado entre o comité e a dirección para renovar o convenio colectivo. O texto, que terá unha vixencia de catro anos, contempla un incremento salarial de 400 euros anuais, a realización de 40 contratos indefinidos no colexio de especialistas e non cialificados/as e a desaparición da categoría de nova entrada.


2016 09 10 AsembleaConvenioBorgWarner
Segundo explican dende o comité de BorgWarner (CIG, UGT, USO, CGT, CCOO e CSIF), o acordo coa empresa foi ratificado este sábado día 10 en asemblea por 374 votos a favor, 30 en contra, sete en branco e dous nulos.
Na consulta participaron un total de 413 dos 598 traballadores/as da compañía que fabrica componentes para o sector da automoción. O preacordo coa compañía alcanzárase o pasado día 2 tras máis de 40 xuntanzas e despois de que os empregados/as fixesen pública a súa intención de convocar unha folga.
Unha vez asinado o acordo, o convenio colectivo terá unha duración de catro anos e contempla un incremento salarial lineal de 400 euros anuais a aplicar sobre o salario base para o conxunto do cadro de persoal. Entre os principais aspectos que a parte social logrou incorporar ao texto figura a realización de 40 contratos indefinidos no colexio de especialistas e non cualificados/as, ademais de establecerse que o 70% da contratación deberá ser indefinida e o 4% deberá corresponder a persoas con discapacidade. Ao mesmo tempo, o persoal de BorgWarner logrou a retirada da categoría de nova entrada na empresa, polo que o persoal eventual parasará a cobrar igual que indefinido nun prazo máximo de tres anos.
En canto ao complemento por cantidade de traballo, pasa a ser de importe fixo co máximo da prima de produción. No colexio de técnicos/as e administrativos/as establécese un complemento por produtividade dun máximo de 600 euros anuais para todos/as aqueles/as que cobren menos de 30.000 euros ao ano. Outra das melloras que se introducen no convenio é o dereito a dous días laborábeis por asuntos propios por ano natural para todos os traballadores/as.
No que respecta ás baixas por enfermidade ou accidente, no colexio de especialistas a prestación da incapacidade temporal complementarase ao 100% da base reguladora dende o primeiro día de baixa. Ademais, o seguro colectivo fixa unha indemnización de 28.000 euros por enfermidade profesional ou accidente laboral con resultado de invalidez permanente en grao parcial.
Finalmente, a empresa renuncia a utilizar a distribución irregular da xornada laboral e a aplicar a causa de despido por razóns obxectivas que figura no artigo 52 d/ do Estatuto dos Traballadores/as durante a vixencia do presente convenio colectivo.